الـذوق والابـداع متجمعـه فيـه والصّدق والاخلاص اجمل صفاتـه
من شاف زوله قال من قلب لبيـه لبيه يـا العقـل الرّزيـن وثباتـه
ادعج غنج والثقل طبعـه محليـه هذا وحسنه مستتـر فـي عباتـه
واشلون لا فرّع وبانـت حسانيـه العود يتشبّـب ويحـذف عصاتـه
الارض تفرح لا وطتهـا خطاويـه ويفوح لـه ورد الرّبيـع ونباتـه
والمزن يرقص له بعالي مناشيـه ويداعبه ريـح الهبـوب استماتـه
مالك وسام الزين باسمى معانيـه حسن ودلال وفـارق ٍ فـي حلاتـه
زينه طبيعي ما وجد مـن يحاليـه حتى لو انه صاحي ٍ مـن مباتـه
نظرة عيونه ساحره حضرة البيـه ومن سحرها كن البشر من هواتـه
امن الأناقه كل مـا فيـه يزهيـه وامن اللباقه يعتبـر مـن دهاتـه
امن الترف نطقه هلوو هاي واوكيه وامن الدّلع يغريك حتـى التفاتـه
اموت لامن قـال بإحـراج امبيـه واذوب في خـدّه وعضّـة شفاتـه
محلى لسانه لا لعب بيـن اشافيـه فتنه ليا سولـف وفتنـه سكاتـه
ضحكه جميل وضحك غيره ما دانيه لبيه فـي مزحـه ولبـى خملاتـه
يا ليتني موج ارتمي فـي موانيـه والآمس اعماقـه واحطـم عداتـه
احب انا عْتابه واحـب المشاريـه متبادليـن الحـب ذاتـي و ذاتـه
لا ضاق صدري منهو اللي يسليـه غيره طبيب الروح يبعـد شتاتـه
أنشهد أنه غير في عيـن مغليـه وانشهد أنه فـارق ٍ فـي غلاتـه
ومن كثر ما اودّه واراعيه واغليـه حجم الغلا يشبه طويـق ابعلاتـه
اضيق لامن غاب واغيـب واتيـه والقلب يبدى في مسيـرة شقاتـه
ولو كان ينسانـي فلانـي بناسيـه وهو شبيـه الريـم قلبـي فلاتـه
احترت مدري يا جماعه شسميـه بس الأكيـد انـه فريـد بصفاتـه
الله من عيون الحواسيـد يحميـه والله يحقـق لـه جميـع امنياتـه
ويا جعلني ما اذوق حزنه ولا ابكيه ولا خـلا منـه ومـن ذكريـاتـه